الميزيريا وقلّة الحياء

 

موريطانيا حتّى لوكان بعثت الحوت برك، نقولولها بارك الله فيك وربّي يعوّض عليك بخيرو ويبعّد عليك السّاسة الهمّال ورجال الأعمال وأحزاب اليورو والدّرهم والريال وإن شاء الله في المستقبل يلطف بينا ربّي ونولّيو كيفك عنّا باش نعاونو موش مادّين يدّينا "يا كريم متاع الله"، واللي يتصدّق علينا إنّبّرو عليه، الميزيريا وقلّة الحياء.

لوكان الدّنيا دنيا رانا شادّين التّراكن نندبو فيهم.. تونس متاع الـ"3000 عام حضارة"  ولاّت نطلب وشعبها شايخ يكشّخ فرحان بالطّيارات الهابطة طالعة بالإعانات والصّدقات ويطالب بالمزيد ومانعرفش خمّمش كيفاش في المستقبل ماش يرد الجميل للّي يستاهل وكيفاش ماش يهزّ عينيه قدّام اللي مايستاهلش.

إذا ماش نواصلو هكّة، بقدرة ربّي، عويمات أخرين نولّيو شولاقة، اللي حاجتو بيها يغسلها ويحدّدها باش يستعملها وبعد يلوّحها واللي زايدة عليه يعلّقها مسّاحة في بيت الرّاحة.. لا يبقالنا رأي نعاندو بيه ولا موقف يحترمونا عليه.

قبل قالو: "لا حرّيّة لشعب يأكل من وراء البحار" واليوم، الله غالب، نقولو: "اللي حياتو مرهونة بالصّدقات لا عاش ولا كان فيه" و"اللي الذّل يغنيه القبر أولى بيه".